Xəbərlər
[22.09.2008] "Ekol Mühəndislik Xidmətləri" QSC-nin baş direktoru Soltan Əliyevin Biznesmen jurnalına müsahibəsi
"Ekol Mühəndislik Xidmətləri" QSC-nin baş direktoru Soltan Əliyevin Biznesmen jurnalına müsahibə vermişdir. Müsahibəni olduğu kimi Sizə təqdim edirik.
-Qədim filosoflardan biri insan həyatını səhifələri elə onun özü tərəfindən yazılan bir
kitaba bənzədir. Bilmək olarmı: bəs Sizin ömür kitabınızın səhifələrində bu günədək hansı əlamətdar hadisələr yer almışdır?
- Maraqlı sualdır. Hər bir insanın həyatında olduğu kimi mənim də həyatımda əlamətdar hadisələr çox olub. Tələbəçilik illəri həyatımın ən maraqlı səhifələrindəndir.
Həyatımın əsas və maraqlı anları Dövlət Neft Şirkətindəki əmək fəaliyyətim ilə bağlıdır. "Ekol Mühəndislik Xidmətləri" Qapalı Səhmdar Cəmiyyətinin və ARDNŞ-nin Ekologiya İdarəsinin yaradılmasında olan əməyimlə həmişə qürur hissi keçirirəm. Rəhbərlik etdiyim müəssisənin və kollektivin hər bir uğuru mənim üçün əlamətdar hadisədir.
Cari ilin may ayında ARDNŞ-nin Prezidenti cənab Rövnəq Abdullayevin müəssisəmizdə olması və yeni neftşlamın emalı qurğusuna start verməsi yaddaşımda qalan hadisələrdəndir. Həyatımın maraqlı anlarından biri də Bibiheybətlə bağlı apardığımız işlərlə bağlıdır.
- İstənilən Şirkətin yaranma tarixçəsi - uğur və uğursuzluqların, yeni ideya və qərarların axtarışının çulğalaşdığı sonsuz hadisələr qalareyasıdır. Bu mənada "EKOL" şirkətinin yaranma tarixçəsi ilə oxucularımızı tanış edə bilərsinizmi?
-Azərbaycanda uzun illər neftin və qazın hasilatı zamanı formalaşan tullantılar torpaqların və su hövzələrinin çirklənməsinə gətirib çıxarmışdır. Ölkəmizin dinamik inkişafı ilə yanaşı Respublikamızda, xüsusilə Abşeron yarımadasında mövcud ekoloji problemlərin həlli ən aktual məsələlərdən biridir. Bu problemlərin həllində ARDNŞ -nin də qarşısında mühüm vəzifələr qoyulmuşdur.
Azərbaycan Respublikasında ekoloji vəziyyətin yaxşılaşdırılması və ARDNŞ-nin fəaliyyət sahələrində ekoloji yönlü layihələrin həyata keçirilməsi məqsədi ilə, dünya standartlarına cavab verən müasir tipli birgə müəssisələrin yaradılması və bu işlərə xarici investorların cəlb olunması zərurəti yaranmışdır.
Məhz bu zərurətdən 01 mart 2006 - cı il tarixdə ARDNŞ-nin (51%) və "Lancer" Environmental Consultinq Şirkətinin (49%) təsisçiliyi ilə "Ekol Mühəndislik Xidmətləri" Qapalı Səhmdar Cəmiyyəti yaradılmışdır.
Qısa müddətdə QSC əsasən xarici təsisçinin investisiyası hesabına özünün güclü maddi texniki bazasını yaratmış, ən müasir texnika və texnologiyalarla təchiz edilmiş, Dövlət orqanlarının lisenziyalarını və TSE- İSO- EN- 14001 beynəlxalq sertifikatını almışdır. Müəssisədə yüksək ixtisaslı mühəndis - texniki işçilər, mütəxəssislər və peşəkar fəhlə heyəti çalışır.
- Müasir dünyamız üçün olduqca mühüm əhəmiyyətə malik bir missiyanın daşıyıcısı olan " EKOL " şirkətinin əsas fəaliyyət sahələri hansılardır?
-Şirkətimiz insanların sağlamlığına xidmət edən ətraf mühitin sağlamlaşdırılması sahəsində ümumbəşəri bir missiyanın iştirakçısıdır.
Şirkət əsasən sənaye çirkab sularının təmizlənməsi, neftşlamın emalı və zərərsizləşdirilməsi, torpaqların rekultivasiyası və remidasiyası, tutumların təmizlənməsi, ekoloji texniki normativ sənədlərin işlənib hazırlanması, ekoloji monitorinq işlərinin aparılması, kompleks laboratoriya xidmətlərinin göstərilməsi, bağçılıq təsərrüfatının yaradılması, şəlalələrin fontanların və suvarma sistemlərinin quraşdırılması, yaşıllıqların salınması, gül və bəzək kollarının, ağacların əkilməsi və becərilməsi, torpağın profilinin çıxarılması və kimyəvi analizinin aparılması, torpaqların üzvi və qeyri üzvi gübrələrin verilməsi ilə münbitləşdirilməsi və s. bu kimi ekoloji yönlü fəaliyyət sahələri ilə məşğuldur.
- Sentyabr ayında Azərbaycan Respublikasının Prezidenti İlham Əliyev cənabları tərəfindən ölkəmizin ekologiyası sahəsində dövlət proqramının qəbulu və həyata keçirilməsi üzrə Sərəncamın verilməsinin iki ili tamam olur. Bu mühüm sənəddə verilmiş müddəalardan hansıları "EKOL" şirkətinin əsasını təşkil edir?
-Respublika Prezidentinin 28 sentyabr 2006 - cı il tarixli, 1697 saylı sərəncamı ilə təsdiq edilmiş "Azərbaycan Respublikasında ekoloji vəziyyətin yaxşılaşdırılmasına dair 2006 - 2010-cu illər üçün "Kompleks Tədbirlər Planı" Şirkətimiz tərəfindən diqqətlə təhlil olunmuşdur. Bu sərəncamla təsdiq edilmiş "Tədbirlər Planı" nda ARDNŞ tərəfindən bir sıra ekoloji problemlərin həlli nəzərdə tutulmuşdur. Şirkətimiz bu problemlərin həllində özünü potensial podratçılar qismində təsdiq etmişdir.
-"Kompleks Tədbirlər Planı" nın icrası ilə əlaqədar olaraq , "Ekol Mühəndislik Xidmətləri " QSC ekoloji layihələrin həyata keçirilməsi, sənaye-çirkab sularının və neftşlamın təmizlənməsi prosesinin ətraf mühitə mənfi təsirinin azaldılması məqsədilə, xarici təsisçinin investisiyası hesabına ən müasir texnika və texnologiyaların alınması və tətbiqi istiqamətində xeyli işlər görmüş, "Bibiheybətneft" NQÇİ - nin mədən ərazilərində torpaqların təmizlənməsinə başlamışdır.
Ətraf mühitin mühafizəsi və ekoloji durumun yaxşılaşdırılması istiqamətində ARDNŞ-nin 30 - dan çox təşkilatında ekoloji yönlü layihələr həyata keçirilir. Aparılmış ekoloji tədqiqatlar nəticəsində Hövsan və Bibiheybət sahələrindəki çirkab su kanallarında təmizləyici qurğuların quraşdırılması sahəsində tədqiqat işləri aparmışdır.
-Azərbaycan-zəngin tarixi dövlətçilik ənənələri olsa da müstəqilliyinin bərpası baxımından yetərincə gənc dövlətdir. Bu mənada təbii ki, ekoloji problemlərin həlli sahəsində müvafiq elmi və texniki potensialın ərsəyə gətirilməsi baxımından görüləsi işlər az deyildir. Yəqin ki, həmin amili nəzərə alaraq Siz bu istiqamətdə toplanmış dünya təcrübəsinə müraciət etmisiniz. Ekoloji problemlərin həlli sahəsində hansı xarici şirkətlərlə tərəfdaşlıq edirsiniz?
-Şirkətimiz öz fəaliyyətində tarixi dövlətçilik ənənələrinə, elmin və dünya təcrübəsinin son nailiyyətlərinə əsaslanır. Fərəh hissi ilə qeyd etmək istəyirəm ki, ekologiya sahəsində respublikamızda güclü kadr potensialı vardır və şirkətimiz bu mütəxəssislərlə sıx əməkdaşlıq edir, lazım gəldikdə onları ekoloji layihələrin icrasına cəlb edir.
Ekoloji problemlər qlobal xarakter daşıdığından, respublikamızdakı bugünkü problemlər demək olar ki, dünyanın bir çox dövlətlərin problemləri ilə eynidir. Bu baxımdan öz fəaliyyətimizdə ekologiya sahəsində dünyanın ən qabaqcıl təcrübələrini tətbiq edirik.
Bu istiqamətdə dünyada tanınmış Almaniyanın "Facet", "Oswald Shults", "Emscher Genossenschaft", " Projekt Engineerinq Wincker GmdH"İsveçrınin " Alfa-Laval " və BP Əməliyyat Şirkətləri ilə işgüzar əməkdaşlıq edirik.
"EKOL" şirkəti iqtisadi əlaqələrinin genişləndirilməsi və gələcəkdə ekoloji layihələrin birgə həyata keçirilməsi məqsədilə Xəzəryanı dövlətlərdə fəaliyyət göstərən müvafiq qurumlarla əməkdaşlıq etmək və bu dövlətlərdə öz nümayəndəliklərini açmaq niyətindədir.
- İstər yüksək dini-mənəvi dəyəri, istərsə də " Sevinc buxtası" kimi ölkəmizdə dəniz-sənaye neftçıxarmasının başlanğıc nöqtəsi olaraq dünya neft hasilatı tarixində tutduğu mühüm yer baxımından hər bir vətəndaşımıza doğma olan Bibiheybət ərazisində "EKOL" şirkəti tərəfindən hansı işlər görülmüşdür və bununla bağlı nə kimi perspektiv planlarınız vardır?
- Mən çox xoşbəxtəm kı, Ulu Öndərimiz, tarixi şəxsiyyət Heydər Əliyevlə bir dövrdə yaşayıb, onun şah əsəri olan Azərbaycan dövlətinin qurulmasının şahidi və iştirakçısı olmuşam.
Məhz 1993 - cü ildə xalqın tələbi və təkidi ilə Heydər Əliyevin hakimiyyətə gəlməsi ilə bütün sahələrdə olduğu kimi, mənəviyyat sahəsində də Azərbaycan xalqı öz mənəvi və dini köklərini qayıtdı.
1994 - cü ildə Qurban bayramında Heydər Əliyev Bibiheybət məscidini ziyarət etdi və Respublikanın iqtisadi çətinliklərinə baxmayaraq burada yeni məscid binasının tikilməsi barədə göstəriş verdi. Bununla da dini mənəvi dəyərlərimizdən olan Bibiheybət Ziyarətgah Kompleksinin əsaslı yenidənqurma və tikinti işləri başa çatdırıldı, 12 iyul 2008 - ci ildə isə möhtərəm Prezidentimiz İlham Əliyev tərəfindən Kompleksin açılışı oldu.
"Sevinc buxtası" kimi tanınmış, dini-mənəvi dəyərlərimizin nümunələrindən olan, Bibiheybət Ziyarətgah Kompleksinin də yerləşdiyi bu ərazidə yaranmış ekoloji böhran vəsiyyətinin aradan qaldırılması və təbiətin bərpası barədə möhtərəm Prezidentimiz İlham Əliyevin sərəncamına uyğun olaraq Kompleks Tədbirlər Planı hazırlanmış, bu sahədə işlər ötən ildən başlayaraq böyük vüsət almışdır. Bununla da mühüm əhəmiyyət kəsb edən və Bakımızın bir parçası olan Bibiheybət sahəsində təbiətin bərpasına start verilmişdir.
"EKOL" şirkəti də ARDNŞ-nin potensial podratçısı qismində "Kompleks Tədbirlər Planı"nın həyata keçirilməsinin fəal iştirakçısına çevrilmiş və ekoloji bərpa işlərini həyata keçirir.
Şirkət tərəfindən ilk növbədə ərazidə monitorinq işləri aparılmış və çirklənmə dərəcəsi müəyyən olunmuşdur. Ümumilikdə 526 hektar sahənin təmizlənməsi şirkətimizə həvalə edilmişdir. Çirklənmiş torpaq sahələri təmizlənərək yararlı hala salınmış, yaşıllaşdırma tədbirləri görülmüşdür.
Hazırda Şirkət özünün xüsusi texnikası və işçi qüvvəsi ilə ərazidə ən çox çirklənmə dərəcəsi olan " KOVŞ" adlanan ərazidə torpaqların təmizlənməsi işlərini yerinə yetirir.
Bibiheybət sahəsində görüləcək işlərin nəzərdə tutulmuş müddətdə başa çatdırılması üçün Şirkətin bütün imkanları səfərbər edilmişdir.
Bilirsinizmi? Dini - mənəvi dəyərlərimizin və təbiətin bir parçası olan Bibiheybət sahəsinin əvvəlki və indiki vəziyyətini, eləcə də görülən işlərə nəzər saldıqca, Ulu Öndər, fenomen bir şəxsiyyət Heydər Əliyevin və onun layiqli davamçısı, möhtərəm Prezidentimizin uzaqgörənliyinə , vətənə məhəbbət hissinin sonsuzluğuna və bu vəhdətin harmoniyasına heyrətlənməyə bilmirsən.
Bütün bunlar məndə bir maraq oyadıb. Müdrik rəhbərlərin ideyalarının təntənəsini, mənəviyyatımızın və təbiətin bərpasını, insan əməyinin yaratdığı xariqələri əks etdirən bir sənədli film çəkdirmək.
- Maraqlıdır. Siz bu filmi necə görürsünüz?
- Bu sənədli film ən peşəkar studiya tərəfindən 35 mm - lik kinolentə çəkiləcək və təxminən 30-45 dəqiqə davam edəcək. Filmdə sənədlərdən və arxiv materiallarından istifadə etməklə Bibiheybət sahəsinin əvvəlki və hazırkı vəziyyəti, Milli Liderimiz Heydər Əliyevin və möhtərəm Prezidentimiz İlham Əliyevin mənəviyyatımızın və təbiətin bərpası haqqında ideyaları öz əksini tapacaqdır.
-Sizə bu məsuliyyətli və tarixi əhəmiyyətli işin başa çatdırılması üçün uğurlar arzulayırıq.
- Təşəkkür edirəm.
- Aqillərdən biri deyib - "Xeyirxahlığa inanmaq üçün gərək özün xeyirxahlıqla məşğul olasan" . Bilmək istərdik ki, başçılıq etdiyiniz " EKOL" şirkətinin sosial proqramı hansı məsələləri əhatə edir?
- Cəmiyyətimizdə xeyriyyəçiliyə önəm verilməsi bu ənənənin dərin tarixi köklərə malik olması ilə bağlıdır. Bu baxımdan şirkətimizdə insan faktoru , işçilərin sosial problemlərinin həlli və onlara fərdi yanaşma prinsipi ən ümdə məsələlərdən biridir.
ARDNŞ-nin Prezidenti cənab Rövnəq Abdullayevin fikrincə "işçilər işə sevinə-sevinə gəlməlidirlər ki, onları işdə yaxşı şərait və mehriban kollektiv gözləyir, evlərinə isə sevinə-sevinə getməlidirlər ki, ailəsinə qazanc aparırlar". Hər bir işçiyə qayğı ifadə edən bu fikir müəssisəmizdə ardıcıl olaraq həyata keçirilir.
Şirkətdə çalışan işçilərə avropa standartlarına uyğun iş şəraiti təşkil edilmişdir. Hər yay mövsümində işçilərin və onların ailə üzvlərinin istirahəti respublikamızın yüksək səviyyəli istirahət zonalarında təşkil olunur. Onların idman və mədəni - kütləvi tədbirlərə qatılması üçün lazımı şərait yaradılır, gündəlik pulsuz yeməklə və süd məhsulları ilə təmin olunurlar.
İşçilərin tibbi müayinədən keçirilməsi və lazımı hallarda müalicəsi şirkətin hesabına təmin edilir, onlara maliyyə köməkliyi göstərilir. Ümumiyyətlə şirkətdə sosial məsələlərin həlli qanunvericilikdə nəzərdə tutulmuş qaydada yüksək səviyyədə həll olunur.
Şirkətdə "EKOL" mini futbol klubu fəaliyyət göstərir. Komanda dəfələrlə rayonlararası və müəssisələrarası yarışların qalibi olmuş, may ayında isə Yeni Azərbaycan Partiyası rayon təşkilatlarının keçirdikləri yarışda birinci yeri tutmuşdur.
ARDNŞ-nin prezidenti cənab Rövnəq Abdullayevin AFFA prezidenti seçilməsi ilə respublikamızda futbola qayğı və diqqətin artması "EKOL" mini futbol klubunda da ruh yüksəkliyi yaratmışdır.
Hazırda təcrübəli məşqçilər və bacarıqlı oyunçulardan ibarət komanda heyəti Respublika çempionatına ciddi hazırlaşır. Məqsədimiz yalnız çempion olmaqdır.
-Deyə bilərsinizmi "EKOL" şirkəti Azərbaycan neftçilərinin peşə bayramını hansı töfələrlə qarşılayır?
-Hər il olduğu kimi şirkətimiz bu ildə neftçilərin peşə bayramını xüsusi töhfələrlə qarşılayır.
Cari ilin ikinci rübündə xarici təsisçinin investisiyası hesabına neftşlamın emalı və zərərsizləşdirilməsi üçün "Alfa - Laval" şirkətinin gücü 30 m3/saat olan 2 ədəd ən müasir tipli 2 fazalı Dekantr qurğusu alınmış, onlardan biri "Azərneftyağ" NEZ-nun sahəsində, digəri isə Heydər Əliyev adına BNEZ - nun ərazisində quraşdırılmış və istifadəyə verilmişdir. Bundan başqa sənaye-çirkab sularının qapalı sistemlə təmizlənməsi məqsədilə Almaniyanın "Facet" şirkətinin gücü 1200 m3/saat olan su təmizləyici qurğusu alınıb quraşdırılmış və neftçilərin peşə bayramı ərəfəsində istifadəyə veriləcəkdir.
"EKOL" şirkəti bundan sonra da öz fəaliyyət dairəsini günü-gündən genişləndirəcək, maddi-texniki bazasını daha da gücləndirəcək , ekoloji layihələrin həyata keçirilməsində ARDNŞ-nin ən potensial podratçısı olaraq qalacaq və Respublika iqtisadiyyatının dinamik inkişafında öz töhfələrini verəcəkdir.
Şirkətimizin kollektivi həmişə olduğu kimi, gələcəkdə də Respublikamızın ictimai-siyasi həyatında fəal iştirakçılardan olacaq, qarşıdan gələn Prezident seçkilərində sabitliyə, iqtisadiyyatın dinamik inkişafına, hüquqi dövlət quruculuğuna, milli mənafeyin qorunub saxlanmasına, güclü ordu quruculuğuna və xalqımızı işıqlı gələcəyə aparan Heydər Əliyev siyasi kursuna səs verəcəklər.
- Söhbətimizin sonunda icazə verin Sizə və başçılıq etdiyiniz şirkətin hər bir əməkdaşına öhdənizə götürdüyünüz bu xeyirxah missiyanın uğurla həyata keçirilməsi işində müvəffəqiyyətlər arzulayaq, uğurlar diləyək.
- Çox sağ olun. Sizə öz minnətdarlığımı bildirirəm.
|