ARDNŞ-nin beynəlxalq aləmdə və ölkə daxilində fəaliyyəti genişləndikcə Şirkətin strukturunun təkmilləşdirilməsi və bacarıqlı, yüksək səviyyəli kadrların rəhbər vəzifələrə təyin olunması istiqamətində də məqsədyönlü tədbirlər həyata keçirilir. Dövlət başçısının 12 may 2010-cu il tarixli müvafiq Sərəncamları ilə ARDNŞ-nə yeni vitse-prezidentlərin təyin edilməsi də bu tədbirlərin tərkib hissəsidir.
Xəbər verildiyi kimi, Respublika Prezidentinin 12 may 2010-cu il tarixli Sərəncamı ilə “Ekol Mühəndislik Xidmətləri” QSC-nin baş direktoru Soltan Tərlan oğlu Əliyev ARDNŞ-nin ekologiya üzrə vitse-prezidenti təyin edilmişdir. Bununla əlaqədar olaraq təsisçilərin birgə qərarı ilə ( ARDNŞ və “Lancer Services S.A.” Şirkəti) “Ekol Mühəndislik Xidmətləri”QSC-nin baş direktorunun ümumi işlər üzrə müavini Ramil Cavanşir oğlu Əliyev QSC-nin baş direktoru vəzifəsinə təyin olunmuşdur.
Yeni təyinatla əlaqədar olaraq may ayının 27-də QSC-də baş direktorun təqdimetmə mərasimi keçirilmişdir. ARDNŞ-nin vitse-prezidenti Soltan Əliyev mərasimdə çıxış edərək son illərdə “Ekol Mühəndislik Xidmətləri” QSC-nin əldə etdiyi uğurlardan, qazandığı nailiyyətlərdən, həyata keçirdiyi sosial-iqtisadi və ekoloji layihələrdən ətraflı danışmışdır.
Sonra Soltan Əliyev QSC-nə yeni təyin edilmiş baş direktoru mərasim iştirakçılarına təqdim edərək, onunla uzun müddət bir yerdə çalışdıqlarını, bacarıqlı bir rəhbər kimi formalaşdığını, kollektiv arasında böyük nüfuza malik yüksək səviyyəli rəhbər kadr olduğunu vurğulamış, yeni baş direktoru təbrik edərək ona gələcək fəaliyyətində uğurlar arzulamışdır.
Mərasimdə çıxış edənlər, baş direktorun istehsalat üzrə müavini-Texniki direktor Məzahir Hüseynov, baş direktorun məsləhətçisi Kamil Akimov, Maliyyə-uçot departamentinin rəisi Əli Bağışov və digərləri təsisçilərin rəhbərliyinə bu təyinatla ən düzgün seçim etdiklərinə görə öz minnətdarlıqlarını bildirdilər. Çıxışçılar baş direktor Ramil Əliyevi təbrik edərək, ona gələcək fəaliyyətində uğurlar dilədilər və daim ona dəstək olacaqlarını vurğuladılar.
“Ekol Mühəndislik Xidmətləri” QSC-nin baş direktoru Ramil Cavanşir oğlu Əliyev ona göstərilən böyük etimada görə ARDNŞ-nin və Lancer Services S.A. Şirkətinin rəhbərliyinə və kollektivə minnətdarlığını bildirmiş və bu etimadı əməli fəaliyyəti ilə doğruldacağını mərasim iştirakçılarının diqqətinə çatdırmışdır.
- Ramil Cavanşir oğlu Əliyev 11 may 1980-ci ildə Naxçıvan şəhərində anadan olmuşdur. 2000-ci ildə Naxçıvan Dövlət Universitetini bitirərək hüquqşünas ixtisasına, 2006-cı ildə isə Azərbaycan Dövlət Neft Akademiyasını bitirərək iqtisadçı-menecer ixtisasına yiyələnmişdir.
2004 - 2005-ci illərdə ARDNŞ-nin “Azinteroil” BM-də mühəndis, şöbə rəisi vəzifələrində, 2006-ci ildən isə “Ekol Mühəndislik Xidmətləri” QSC-nin baş direktorunun ümumi işlər üzrə müavini vəzifəsində çalışmış, 2007-ci ildə QSC-nin baş direktor vəzifəsini icra etmişdir.
Yeni Azərbaycan Partiyası, Nizami rayonu “Ekol” ilk ərazi təşkilatı sədrinin müavinidir. Ailəlidir, bir oğlu və bir qızı vardır.
tarix : 28.05.2010
|