“Küləyə qalib gəl” şüarı altında yeddinci dəfə keçirilən Bakı Marafonu bu il fərqli marşrutda təşkil edilmişdir. Yarışın start və finiş nöqtələri Dövlət Bayrağı Meydanında olmuşdur. 18 mindən çox yarış iştirakçıları 21 kilometrlik məsafə qət etmişlər. Marafona Azərbaycan vətəndaşları ilə yanaşı, ölkədə yaşayıb-çalışan əcnəbilər, Almaniya, Çin, Gürcüstan, İraq, İtaliya, Qazaxıstan, Pakistan, Rusiya, Suriya, Türkiyə, Ukrayna və digər ölkələrin vətəndaşları da qoşulublar.
“Bakı Marafonu-2024” layihəsinin əsas tərəfdaşlarından olan SOCAR-ın əməkdaşları ilə birlikdə “Ekol Mühəndislik Xidmətləri” QSC-nin əməkdaşları da bu sosial yönümlü tədbirdə iştirak etmişlər.
Küləkli hava şəraitində aparılan maraqlı idman mübarizəsinin sonunda qaliblər müəyyənləşib. Qadınların yarışında ukraynalı Nataliya Semenoviç birinci olub. Azərbaycan təmsilçisi Anna Yusupova marafonu ikinci, qazaxıstanlı Nelli Qaitova üçüncü pillədə başa vurublar.
Kişilərin mübarizəsində türkiyəli Ahmet Alkanoğlu finişə hamıdan tez çatıb. İkinci yeri ukraynalı Boqdan Semenoviç, üçüncü yeri uqandalı İsmail Senyange tutublar.
Marafon yarışında kişi və qadın kateqoriyası üzrə ilk 3 yeri tutan iştirakçılardan müvafiq olaraq I yer 3000 manat, II yer 2000 manat və III yer 1000 manat pul mükafatı qazanmışlar.
Marafonda “Ekol Mühəndislik Xidmətləri” QSC-nin Kargüzarlıq və icraya nəzarət şöbəsinin kuryeri Ümüd İsmayılov və Ekologiya İdarəsinin Ekoloji Monitorinq Departamentinin böyük mühəndisi Füzuli Şıxəliyev 2 min mükafatçılar sırasında yer almışlar.